Zur Navigation

Zum Seiteninhalt

Decisiuns giudizialas

(Valair valan las sentenzias communitgadas u publitgadas da las dretgiras.)


Sentenzias areguard il WEF 2000
Cun la decisiun dals 11 da schaner 2000 ha la vischnanca da Tavau dà a differentas persunas la permissiun da demonstrar la dumengia, ils 30 da schaner 2000. Las petentas ed ils petents avevan dumandà la permissiun per demonstrar la sonda, ils 29 da schaner 2000. In recurs cunter la disposiziun dals 11 da schaner 2000 ha la dretgira administrativa dal chantun Grischun refusà cun la sentenzia dals 26 da schaner 2000.


Sentenzia 1P.117/2000 dal tribunal federal dals 30 da zercladur 2000

Il tribunal federal ha approvà il recurs da dretg public cunter la sentenzia da la dretgira administrativa dals 26 da schaner 2000 pervi da refusa da l'attenziun giuridica ed ha returnà la chaussa a l'instanza precedenta per la giuditgar da nov.


La dretgira administrativa ha returnà la chaussa a la vischnanca da Tavau. Quella ha prendì ina nova decisiun ils 26 da settember 2000, e quai cun il medem resultat sco la decisiun dals 11 da schaner 2000.

Sentenzia U 00 115 da la dretgira administrativa dals 12 da december 2000

La dretgira administrativa ha protegì la decisiun da la vischnanca da Tavau ed ha snegà ina refusa da l'attenziun giuridica sco er ina violaziun da la libertad d'exprimer l'opiniun e da la libertad da reuniun.

Sentenzia 1P.53/2001 dal tribunal federal dals 20 da settember 2001

Il tribunal federal ha refusà il recurs da dretg public cunter la sentenzia da la dretgira administrativa dals 12 da december 2000. El ha snegà ina violaziun da l'attenziun giuridica, ha dentant constatà ch'er plazzas ch'èn accessiblas per la publicitad, ch'èn dentant en proprietad da terzas persunas, stoppian vegnir tratgas en consideraziun sco lieus da demonstraziun alternativs.

Sentenzias areguard il WEF 2001
Cun la disposiziun dals 19 da december 2000 ha la vischnanca da Tavau refusà ina permissiun per far ina demonstraziun la sonda, ils 27 da schaner 2001.


Sentenzia U 00 130 da la dretgira administrativa dals 23 da schaner 2001

La dretgira administrativa dal chantun Grischun ha refusà in recurs cunter la disposiziun da la vischnanca da Tavau dals 19 da december 2000.

Sentenzia BGE 127 I 164 ff. dal tribunal federal dals 20 da settember 2001

Il tribunal federal ha refusà il recurs da dretg public cunter la sentenzia da la dretgira administrativa dals 23 da settember 2001. El ha snegà ina violaziun da l'attenziun giuridica, ha dentant constatà ch'er plazzas ch'èn accessiblas per la publicitad, ch'èn dentant en proprietad da terzas persunas, stoppian vegnir tratgas en consideraziun sco lieus da demonstraziun alternativs.

Sentenzia 1P.605/2001 dal tribunal federal dals 7 da matg 2002

Il tribunal federal n'è betg entrà sin in recurs da dretg public cunter l'instrucziun da servetsch dal commando da polizia tar l'acziun da la polizia a chaschun dal WEF 2001.

Sentenzia areguard la revisiun da l'ordinaziun davart la polizia chantunala

Sentenzia 1P.91/2002 dal tribunal federal dals 26 d'avust 2002

Il tribunal federal ha refusà in recurs da dretg public che sa drizzava cunter il nov art. 8a da l'ordinaziun davart la polizia chantunala (DG 613.100).

Resguardai tar questa disposiziun er la missiva da la regenza al cussegl grond (carnet nr. 7/2001-2002, p. 421 ss.) ed il protocol da la sessiun da november 2001 dal cussegl grond (PCG 4 | 2001/2002).