Tenuta da la regenza

 
 
La regenza dal chantun Grischun sa legra d'astgar esser er quest onn l'ospitant dal world economic forum (WEF). Tar la dieta annuala dal WEF a Tavau sa tracti d'ina plattafurma preziusa per la politica exteriura da la Svizra e d'ina da las occurrenzas economicas e sociopoliticas las pli impurtantas en Svizra. La regenza dal chantun Grischun fa tut per garantir ch'il world economic forum vegnia realisà a moda ordinada. En il rom da sias pussaivladads vuless la regenza ultra da quai crear las premissas per che las criticras ed ils critichers dal world economic forum e da la globalisaziun possian intermediar en in rom adequat ed a moda paschaivla lur interess a la publicitad sco er a las represchentantas ed als represchentants da l'economia e da la politica.
 
Cun lur tenuta per realisar il congress a Tavau expriman la regenza e las autoritads da la confederaziun e da la vischnanca da Tavau la voluntad da pussibilitar a Tavau per tuts la libertad d'exprimer l'opiniun. Latiers tutga – en il rom da las pussaivladads – da permetter ina demonstraziun a Tavau u en in auter lieu en il Grischun.
 

Segirezza e libertad durant il WEF

 
 
Er per las dietas annualas dal WEF dattan las autoritads dal chantun Grischun e dal circul da Tavau pais a l'avertura. A medem temp attribueschan ellas dentant – sco durant ils ultims onns – ina impurtanza fitg gronda a la segirezza da las participantas e dals participants dal congress dal WEF sco er a la segirezza da la populaziun e dals giasts da Tavau. Els tuts – las participantas ed ils participants dals congress, la populaziun indigena ed ils giasts – duain pudair sa sentir bain er durant la dieta annuala dal WEF a Tavau. La vita da mintgadi duai pudair ir a Tavau ina via ordinada er durant questa occurrenza impurtanta. Per pudair ademplir las obligaziuns da protecziun tenor il dretg internaziunal e per pudair garantir a tuts il dretg da segirezza èsi necessari da far controllas polizialas.
 
A Tavau duain er circuls ch'èn critics vers la globalisaziun survegnir il pled. Però pretendain nus dad els ch'els exprimian lur protesta cunter ils effects negativs da la globalisaziun a moda paschaivla.
 
Tuttina na po betg vegnir exclus – ni a Tavau ni en in auter lieu dal Grischun – ch'ina minoritad da demonstrantas e da demonstrants cun intenziuns violentas saja pronta da chaschunar acts da violenza e donns. Cunter quai sa preparan las forzas da segirezza minuziusamain. La finamira sto dentant esser quella ch'i na dat insumma betg tals acts. Per quest intent èsi dentant indispensabel da sa respectar vicendaivlamain e d'observar ils dretgs da libertad, dals quals i vegn fatg diever.
 
Tar la preparaziun conscienziusa tutga il giudicament cuntinuà da la situaziun da segirezza. Ensemen cun las instanzas da la confederaziun e dals auters chantuns duain las ristgas pudair vegnir eruidas e giuditgadas a temp.